خليك فى حالـك

السلام عليكم اعضاء المنتدى الغاليين
انا هاتكلم بالعاميه عشان الموضوع
قريب اوى مننا
لو مره ماشى فى الشارع ولقيت واحد
بيجرح فى عربية وقولتله ليه كده يا ابنى
قالك هيا عربيتك ؟
قولتله لأ قالك خلاص خليك فى حالك
بعدها لقيت واحد تانى بيعاكس بنت
قولتله عيب كده يا ابنى
قالك هيا اختك؟
قولتله لأ قالك خلاص خليك فى حالك
مشيت شويه لقيت غيره بيكسر فى زجاج
محل مقفول برضه قولتله ليه كده غلط
قالك وانت مالك خليك فى حالك
وغيرها مواقف زيها كتير
انا أعرف ان الساكت عن الحق شيطان اخرس
ومن رأى منكم منكرا فاليغيره بيده ان لم يستطع
فـ بلسانه ان لم يستطع فـ بقلبه وهذا اضعف الايمان
والمؤمن القوى خير من المؤمن الضعيف
ده اللى اتربينا عليه فجأه لقيت كل ده غلط
ولازم الواحد يكون فى حاله
طيب انا عاوزه اعرف
ايه هوا حالى اللى اخلينى فيه؟
ما انا لو سيبت الولد ده يجرح عربية غيرى
بعدها هايجرح عربيتى
ولو سيبته يعاكس بنت معرفهاش
هايعاكس اختى بعدها
ياترى تخليك فى حالك وتبعد عن المشاكل
لحد ماتيجى لحد عندك ؟
ولا نتخانق كل شويه مع حد عشان انت
مش فى حالك؟
وياترى اللى عايش فى حاله ده
شخص عاقل وكويس؟
واللى مش فى حاله فضولى
ومش كويس وبتاع مشاكل؟
انا شايفه ان احنا كلنا بقينا فى حالنا
زياده عن اللزوم
ياريت نتناقش فى الحكايه دى

بالاول تسلم اديكي اميرة الاحزان ع الموضوع الجميل والرائع

بالنسبه للموضوع
لا مش المفروض نبقا بحالنا ومناش دعوة بحد
وانا ايه دخلي ومن الكلام دا

بس كمان منقدرش نتخانق مع حد لانه مش حيجيب نتيجه اكيد

احنا نعمل الي علينا بالكلمه الحسنه والنصيحه

دا الي نقدر عليه

دا من وجهه نظري

تحياتي ليكي اميرة الاحزان